அஜித்தும் கங்குலியும்.. சில ஒற்றுமைகள்..

பல கஷ்டங்களுக்கு மத்தியிலும் கிரிக்கெட்டில் சாதித்த கங்குலியை பற்றியும், பல இன்னல்களுக்கும் பல பழிகளுக்கும் மத்தியில் தமிழ் சினிமாவில் சாதித்து வரும் அஜித் பற்றியும் நான் சில ஒற்றுமைகளை கூற விரும்புகிறேன்.. (எதுவும் தப்பு இருந்தா மன்னிச்சிடுங்க)

1 ) இருவரும் ஆக்ரோஷமானவர்கள்.
2 ) இருவரும் சந்தித்த இன்னல்கள் அதிகம்.
3 ) இவர்களுடைய எதிரிகளின் கூச்சல்களுக்கு மத்தியிலும் அதை பற்றி கவலைப்படாது முன்னேறியவர்கள்.
4 ) முன்கோபக்காரர்கள், ஆனால் பின்னர் அமைதியை விரும்பியவர்கள்.
5 ) இருவரும் வெளிப்படையானவர்கள்.
6 ) சத்தமில்லாமல் உதவி செய்பவர்கள்.
7 ) கங்குலி அணியிலிருந்து இடைநிறுத்தப்பட்டு பின்னர் மீண்டும் அணிக்குள் திரும்பி தன்னை யாரென நிரூபித்தவர். அஜித் தொடர்ச்சியான தோல்விகளுக்கு பின் வரலாறு, பில்லா என மெகா ஹிட்களை கொடுத்தார்.
8 ) இவர்களை போல் இவர்களுடைய ரசிகர்களும் ஆக்ரோஷமானவர்கள்.
9 ) அதிகம் பேச விரும்பாதவர்கள்.
10 ) இறுதியாக ஒன்று, இவர்கள் இருவரும் தங்கள் ரசிகர்களை நேசிப்பவர்கள்.

எப்படி பதிவு, பிடிச்சிருந்தா வந்து வாக்கு போடுங்க..

இந்திய ஒருநாள் கிரிக்கெட் அணியின் நிலைமை..

தோற்றால் படுதோல்வி, வெற்றிபெற்றால் அமோகவெற்றி.. கிரிக்கெட்டில் அப்படி ஒரு அணி இருக்குமென்றால் அது நிச்சயம் இந்திய அணியாகத்தான் இருக்கும்..
துடுப்பாட்டத்தில் ஜாம்பவான்களை நிரப்பிய ஒரு அணி என்றால் அது இந்திய அணியே..
சேவாக், யுவராஜ் போன்ற அதிரடி ஆட்டக்காரர்களையும், சச்சின், டோனி, டிராவிட் என்ற பொறுமையான துடுப்பாட்ட வீரர்களை நிரப்பிய இன்றைய அணிதான் இந்திய அணி..
2007 உலககிண்ணதொடரில் முதல் சுற்றோடு வெளியேறிய இந்திய அணி, அந்த தொடருக்குப்பிறகு ஆசியா கோப்பை மற்றும் T20 (2009) தொடர் இரண்டில் மட்டுமே படுதோல்வியை கண்டுள்ளது, மற்றைய தொடர்களில் சிறப்பாக மற்றும் ஓரளவு சிறப்பாகவே விளையாடி வருகின்றனர்.

தலைமைத்துவத்தில் டிராவிட், கங்குலி மற்றும் ரணதுங்க ஆகியோரை ஓரளவுக்கு நினைவுபடுத்துபவர் டோனி. இவருடைய தலைமைத்துவத்தின் பின்னர் வெளிநாடுகளில் பல தொடர்களை வென்றது இந்தியா. குறிப்பாக நியூசிலாந்து மற்றும் மேற்கிந்திய அணிகளை அந்நாட்டு மண்களில் வைத்து வெற்றி கொண்டது. பொதுவாக ஆஸ்திரேலியாவிடம் சறுக்கிவிடுபவர்கள் இந்திய அணியினர். ஆனால் இவருடைய தலைமையின் பின் அவர்களின் சொந்த நாட்டில் வைத்து ஒரு நாள் தொடரை வென்றது.

ஒரு காலத்தில் சச்சின் அசாருதின் ஆகியோர் ஆட்டமிழந்தால் மற்ற வீரர்கள் வரிசையாக ஆட்டமிழப்பார்கள். இப்போது அப்படி ஒரு பிரச்சினை உருவாகுவது குறைவு. சச்சின் தவிர காம்பிர், சேவாக், யுவராஜ், டிராவிட், ரெய்னா, டோனி என பல வீரர்கள் திறமையாக விளையாடுகிறார்கள். (எனினும் இவர்களில் டிராவிட் மற்றும் டோனி இருவர் மட்டுமே பொறுமைசாலிகள்.. அதுக்காக எல்லா பந்துகளையும் தட்டகூடாது.. :D)

ஆனால் பந்து வீச்சில் அண்மைக்காலமாக தடுமாறுவது தெரிந்த ஒன்றே. ஆசிஷ் நெஹ்ரா மற்றும் ஹர்பஜன் மட்டுமே ஆறுதல் அளிக்கிறார்கள். இஷாந்த் சர்மாவின் பந்துவீச்சில் எந்த உத்திகளும் தெரியவில்லை. சகீர் கான் எப்போது குணமடைவார் என பல ரசிகர்கள் காத்திருக்கின்றனர்.

களத்தடுப்பில் யுவராஜ், கார்த்திக், ரெய்னா, கொஹ்லி என நல்ல வீரர்கள் உள்ளனர். ஆனால் பல இடங்களில் யுஸுப் பதான் பிடிகளை தவறவிடுகிறார்.. (பிடி மட்டுமல்ல துடுப்பாடமும்தான்.. அவர் ஆறுதலளிப்பது பந்துவீச்சில் மட்டுமே)..

எதிர்வரும் தொடர்கள் மிகவும் சவாலானவை.. குறிப்பாக ஆஸ்திரேலியா மற்றும் இலங்கைக்கு எதிரான போட்டிகள் மிகவும் விறுவிறுப்பாக இருக்கும்.. பார்ப்போம் பந்துவீச்சு மட்டும் களத்தடுப்பு எப்படி இருக்கும் என்று..

விறுவிறுப்பும் ஏமாற்றமும் நிறைந்த ஐ பி எல்..ஒரு பார்வை..

கடந்த வருடம் இந்தியாவில் வெற்றிகரமாக நடைபெற்ற ஐ பி எல் தொடர் இம்முறை தென்னாபிரிக்காவில் நடைபெறுகிறது. தொடர் ஆரம்பத்தில் பெரிதாக மைதானத்திற்கு ரசிகர் கூட்டம் வரவில்லை. ஆனால் போகப்போக ரசிகர்கள் கூட்டம் அதிகரிக்க ஆரம்பித்தது.

இம்முறை ஐ பி எல் கிண்ணத்தை டெக்கான் சார்ஜர்ஸ் அணி வெற்றி தக்க வைத்துள்ளது. யாரும் எதிர்பாராத வண்ணம் பெங்களூர் அணி இறுதிப்போட்டிக்கு தெரிவாகியது.. மும்பை, கல்கத்தா, ராஜஸ்தான் ஆகிய அணிகள் இம்முறை பெரும் ஏமாற்றம் அளித்தன. அதிலும் கடந்த முறை சாம்பியனான ராஜஸ்தான் இம்முறை மிக மிக மோசமாக விளையாடியது, பலத்த சர்ச்சைகளுக்கு மத்தியில் விளையாடிய கல்கத்தா அணிக்கு இம்முறை இறுதியிடமே கிடைத்தது. வெல்வதற்கான சந்தர்ப்பங்கள் பல இருந்தும் மும்பை அணிக்கு அது கிட்டாமல் போனது. பலர் எதிர்பார்த்த வண்ணம் சென்னை மற்றும் டெல்லி அணிகள் அரையிறுதிக்கு முன்னேறின.

மும்பை அணியை பற்றி கூறப்போனால் கடந்த முறை சிறப்பாக ஆடிய ஜெயசூரிய இம்முறை ஓரிரு போட்டிகளில் மட்டுமே சாதித்தார். ஆனால் டெண்டுல்கரின் ஆட்டம் சற்று நம்பிக்கையாக இருந்தது. மலிங்கவின் பந்துவீச்சு அருமையாக இருந்தது. டுமினி 4 அரைச்சதங்கள் பெற்றார். சகீர் கானின் சுகயீனம் இவர்களுக்கு பாதிப்பாக இருந்து இருக்கலாம். மற்றும் இந்த அணியில் அபிஷேக் நாயர் மற்றும் பினால் ஷாவைத் தவிர மற்ற வீரர்கள் மிக மிக மோசமாக செயற்ப்பட்டனர். அதுவும் குல்கர்னியின் பந்துவீச்சு ஏதோ சிறுபிள்ளைத்தனமாக இருக்கிறது. பிரவோ பரவாயில்லை, ஹர்பாஜனின் சுழல் சில போட்டிகளில் சரியாக எடுபடவில்லை. மற்றும் அஸ்ஹ்ரபுல், நந்தா, நேபியர் போன்ற வீரர்களுக்கு வாய்ப்பு அளித்திருக்கலாம். ஆரம்பம் நன்றாக இருந்த இவர்களின் முடிவு மோசமாக அமைந்து விட்டது.

பல சர்ச்சைகளுக்கு மத்தியில் விளையாடிய கல்கத்தா அணிக்கு இம்முறை ஏமாற்றமே மிஞ்சியது. பல திறைமையான வீரர்கள் இருந்தும் தோல்விகளையே தழுவினார்கள். பேசாமல் தலைமைப்பதவியை கங்குலிக்கு வழங்கியிருக்கலாம் என பலர் கூறினார்கள். இவர்களின் ஒரே ஆறுதல் கடைசி லீக் போட்டிகள் இரண்டிலும் வெற்றி பெற்றமை ஆகும். அது அவர்களின் அடுத்த வருட போட்டிகளுக்கு தயார் செய்திருக்கலாம்.

அடுத்து சாம்பியன் டெக்கன் சார்ஜர்ஸ் அணியினரை பார்ப்போம். கடந்த வருடம் மோசமாக செயல்பட்ட இந்த அணி இம்முறை வெகுவாக முன்னேறியது எனலாம். குறிப்பாக இந்த அணியில் விளையாடிய அனைத்து சர்வதேச வீரர்களும் சிறப்பாக செயல்பட்டனர். அடம் கில்கிறிஸ்ட் என்ற ஒரு அனுபவ மந்திரம் செய்த தலைமைத்துவம், அதிரடி ஆட்டம் மற்றும் கிப்ஸ், சைமன்ஸ் என்ற புயல்களின் வேகம் ஆகியவையும், ஆர் பி சிங்க், ஓஜா, சுமன் என்ற இளம் வீரர்களும் அணியின் வெற்றியை வழிவகுத்தனர். சமிந்த வாஸ் சில போட்டிகளில் பங்குபெற்று சிறப்பாக பந்து வீசினார். ஸ்காட் ஸ்டைரிஸ், ஸ்மித், எட்வர்ட்ஸ் போன்ற வீரர்களும் சிறப்பாக செயல்பட்டனர். லக்ஸ்மன் அவராகவே ஒதுங்கி இளைய வீரர்களுக்கு வாய்ப்பளித்து இருக்கலாம் என கருதப்படுகிறது. ரொஹித் சர்மாவின் துடுப்பாட்டம் அதிரவைத்தது..(ஐ பி எல் இல மட்டும் நல்லா அடியுங்க. இன்டர்நேஷனல் ல மட்டும் அடிக்கமாட்டீங்களே. எல்லா பந்துகளையும் தட்டி தட்டி அடிப்பீங்க)

அடுத்து பெங்களூர் அணி. கடந்தமுறை மந்தமாக செயல்பட்ட அணி இம்முறை இறுதிப்போட்டிக்கு தெரிவாகியது. ஆரம்பத்தில் பீட்டர்சனின் தலைமையில் பல சவால்களுக்கு மத்தியில் போராடிய அணி பின்னர் கும்ப்ளேயின் தலைமையில் சிறப்பாக செயல்பட்டது. ராபின் உத்தப்பாவை தவிர மற்ற வீரர்கள் அனைவரும் சிறப்பாக செயல்பட்டனர். அவர் மட்டும் ஏனோ தானோ என்று விளையாடினார். விராட் கொஹ்லி, பாண்டி ஆகியோருக்கு நல்ல எதிர்காலம் உண்டு. மற்றும் தென்னாபிரிக்காவின் வி டி மேர்வே புதிய அதிரடி வீரராக உருவாகியுள்ளார்.பிரவீன் குமார் சில இடங்களில் மெக் கிராத்தை நினைவுபடுத்துகிறார். ட்ராவிடின் ஆரம்ப கட்டம் நன்றாக இருந்தது, மற்றும் அரை இறுதி போட்டியில் சிறப்பாக செயல்பட்டார்.

பஞ்சாப் அணி வெற்றிகளை சந்தித்த அதே வேளையில் தோல்விகளையும் அதிகம் சந்தித்தது. யுவராஜ் சிங் இம்முறை 2 ஹட் ரிக் மற்றும் பல சிக்சர்கள் என கலக்கினார். அவருக்கு பலமாக சங்ககார, மஹேல, பிரெட் லீ, இர்பான் பதான், கடிச் என்ற அனுபவங்கள் இருந்தும் ஏதோ அரை இறுதிக்கு தகுதி பெறாமல் போனது. ஸ்ரீசாந்த் பல ஓட்டங்களை கொடுத்தார்..அதாவது பந்துவீச்சில்..அப்துல்லா அடுத்த தென்னாபிரிக்காவின் பந்துவீச்சு நட்சத்திரம் எனலாம்.

அடுத்து சென்னை அணி. ஆரம்பத்தில் சில தோல்விகளை கண்ட அணி, பின்னர் படிப்படியாக முன்னேறி அரையிறுதிக்கு முன்னேறியது. தோனி தலைமைத்துவத்தில் காட்டிய அக்கறையை துடுப்பாட்டத்திலும் கொஞ்சம் காட்டியிருந்தார். எனினும் சில போட்டிகளில் பிரகாசிக்க தவறினார். ஹெய்டேன் ஏன் சர்வதேச கிரிக்கெட்டில் இருந்து ஓய்வு பெற்றாரோ தெரியவில்லை. இன்னும் விளையாடி இருக்கலாம்.. அவருடைய ஆட்டம் பிரமாதமாக இருந்தது. ரெய்னா ஒரு நட்சத்திரம். முரளி ஜகாடி என பந்துவீசும் ஓங்கியிருந்தது. பாலாஜி ரொம்பவே மெதுவாக பந்து வீசுகிறார். எனினும் ஒரு எதிர்காலம் உண்டு. ஜேகப் ஓரம் மற்றும் மோர்கெல் ஆகியோர் துடுப்பாட்டத்தில் பிரகாசித்து இருந்தால் இன்னும் நன்றாக இருந்திருக்கும்.சிறந்த களத்தடுப்பு வீரர்கள் நிறைந்த இந்த அணி இம்முறை களத்தடுப்பில் ரொம்பவே கோட்டை விட்டது. தோனியின் தலைமையில் அரை இறுதி வரை முன்னேறியது ஒரு சிறிய பெருமையே.

ராஜஸ்தான் அணி இம்முறை படு மந்தமாக செயல்பட்டது. ஷேன் வார்ன் என்ற ஒரு மந்திரவாதியின் மந்திரம் இம்முறை பலிக்கவில்லை. யுஸுப் பதான் சில போட்டிகளில் மட்டுமே பிரகாசித்தார். ஸ்மித் சரி வர விளையாடி இருக்கலாம். ஜடேஜா பரவாயில்லை. கடந்த வருடம் பல அபார வெற்றிகளை பெற்ற இந்த அணி..இம்முறை இறுதி நேரத்திலேயே வெற்றிகளை குவித்தது எனலாம்.

அடுத்து டெல்லி அணி, இவர்களை பற்றி சொல்ல தேவையில்லை. லீக் போட்டிகளில் திறமையாக விளையாடி அரையிறுதியில் தோல்வியை தழுவியது ஒரு சிறிய வருத்தமே. எ பி டி வில்லியர்ஸ், டில்ஷான், வார்னர் என அனைவரும் சிறப்பாக விளையாடினர். ஆரம்ப ஜோடி சேவாக் மற்றும் காம்பிர் இம்முறை சோபிக்க தவறினர். பந்துவீச்சில் மிஸ்ரா கலக்கினார், தினேஷ் கார்த்திக் மீண்டும் இந்திய அணிக்குள் நுழைய போராடுகிறார்.

ஆக இம்முறை போட்டிகள் மிகவும் விறுவிறுப்பாக இருந்து இருக்கலாம். சிலவேளை பந்துவீச்சுக்கு சாதகமாக இருந்து இருக்கலாம். அடுத்த வருடம் பொறுத்து இருந்து பாப்போம் யார் வெல்வார்கள் என..

எம் ஜி ஆர் மற்றும் ரஜினி..இரு துருவங்கள்..

தமிழ் சினிமாவின் சூப்பர் ஸ்டார்களாக திகழ்ந்த இருவர் எம் ஜி ஆர் மற்றும் ரஜினிகாந்த்.
இவர்கள் இருவரின் அளவிற்கு வேறு எந்த தமிழ் நடிகர்களுக்கும் ரசிகர்கள் மற்றும் ஆதரவாளர்கள் இருக்கவில்லை எனலாம். இன்று "மக்கள் திலகம் எம் ஜி ஆர்" அவர்கள் உயிருடன் இல்லாவிடிலும் பல மக்களின் மனதில் உயிருடன் குடிகொண்டு இருக்கிறார். மற்றும் அவருடைய பாடல்கள் இன்றும் மீண்டும் மீண்டும் கேட்கத்தோன்றும்.


ஆரம்பத்தில் சிறு சிறு வேடங்களில் நடித்த எம் ஜி ஆர் பிற்காலத்தில் தமிழ் சினிமாவின் சரித்திரத்தில் இடம்பெறுவார் என யாரும் நினைத்து இருக்கமாட்டார்கள். 1936 இல் சதி லீலாவதி என்ற படத்தில் நடித்தார். ஆனால் பிறகு வந்த "ராஜகுமாரி" திரைப்படத்திற்கு பிறகு தொடர்ச்சியான 25 வருடங்களுக்கு தமிழ் திரைப்பட உலகில் ஒரு "நட்சத்திரமாக" திகழ்ந்தார். இவரை நம்பி படம் எடுத்த பலருக்கு இலாபமே கிடைத்தது. இவர் நடித்த படங்களில் "நாடோடி மன்னன், மலைக்கள்ளன், எங்க வீட்டு பிள்ளை, ஒளிவிளக்கு" ஆகிய படங்கள் பலரால் மறக்க முடியாதவை. மற்றும் இவரை இன்னும் தூக்கி நிறுத்திய விடயங்கள் என்றால் அதில் முக்கியமான முதலாவது விடயம் இவரது திரைப்பட பாடல்கள். இவரது புரட்சி பாடல்கள் எப்போதும் அழியாதவை. மற்றும் இவரது சண்டைக்காட்சிகள் புகழ் பெற்றவை, பல சண்டைக்காட்சிகளை இவரே "டூப்" இல்லாமல் செய்ய முயற்சிப்பார்.

முதலமைச்சர் ஆக முன்னமே இவர் பல மக்களுக்கு உதவி செய்தார். அதுவே இவரை அரசியல் ஆசனத்தில் அமரவைத்தது. அதிகமாக மக்களுடன் கோபம் கொள்ள விரும்ப மாட்டார்.

இவருடைய பாடல்களில் "நான் ஆணையிட்டால்" பாடல் இன்னும் என்னை கவர்ந்த ஒன்று.

தமிழ் சினிமாவில் ஆரம்பத்தில் குணசித்ர மற்றும் வில்லன் வேடங்களில் நடிக்கதொடங்கி பின்னர் சூப்பர் ஸ்டார் என்ற நிலைக்கு முன்னேறிய நடிகர் ரஜினிகாந்த்.

"பைரவி, பில்லா, முரட்டுக்காளை, பிரியா" போன்ற படங்கள் இவரை உச்ச நட்சத்திரமாக மாற்றியது.

எம் ஜி ஆர் க்கு பிறகு அதிக ரசிகர்களை கொண்ட நடிகர் இவர் என்றால் அது மிகையாகாது.
எம் ஜி ஆரைப்போலவே இவருடைய படப்பாடல்களும் பிரபலமானவை. மற்றும் தமிழ் சினிமாவின் முதல் "ஸ்டைல்" நாயகனும் இவர்தான், "சிகரட்"டை ஸ்டைலாக புகைப்பது அதில் முக்கியமான ஒன்று. மற்றும் நகைச்சுவை காட்சிகளில் திறமையானவராக இருந்தார். "தில்லு முள்ளு" படம் சூப்பர் ஹிட் ஆனது பலரின் நினைவில் இருக்கலாம். ஆனால் இவர் எம் ஜி ஆரை போல் சண்டை காட்சிகளில் அதிகம் சிரம் எடுக்க விரும்பமாட்டார். ஆனால் "அண்ணாமலை, ரங்கா, வீரா, பாட்ஷா" போன்ற படங்களில் சிறப்பாக சண்டை செய்தார்.

மற்றும் இவருடைய ரசிகர்கள் வீட்டு சாமி அறையில் இவரும் ஒரு "கடவுள்" ஆக இருக்கிறார். எம் ஜி ஆரைப்போலவே இவரும் பல மக்களுக்கு உதவி செய்தார் எனலாம்.

அரசியல் விடயங்களை தவிர இவர்கள் இருவரும் கிட்டதட்ட ஒரே மாதிரியான குணங்களை கொண்டவர்கள்.

என்னை பொறுத்தவரை இவர்களுக்கு பிறகு வேறு யாரும் "சூப்பர் ஸ்டார்"களாக வலம் வரமுடியாது.

இவர்கள் இருவரும் விலகிவிட்டால் கிரிக்கெட் உலகில் அதைவிட சோகம் வேறெதுவும் இருக்காது ..

"கிரிக்கெட்" ஒரு சிறந்த விளையாட்டு. ஆரம்பத்தில் ஒரு சில நாடுகளில் மட்டும் விளையாடப்பட்ட இது பிற்காலத்தில் உலகில் பல நாடுகளில் பரவியது.

ஒரு சில கிரிக்கெட் வீரர்கள் மக்கள் மனதில் நிறைந்து இருப்பார்கள். அவர்கள் ஓய்வு பெற்றால் அவர்களுக்காக கண்ணீர் வடிப்பார்கள். அன்றைய "பிரட்மன்" இல் இருந்து இன்றைய "கங்குலி" வரை அது நிகழ்ந்துகொண்டுதான் இருக்கிறது.

என்னதான் ஆஸ்திரேலியா, தென்னாபிரிக்கா, இங்கிலாந்து ஆகிய நாடுகள் வலுவாக இருந்தாலும், நம்ம ஆசிய கிரிக்கெட் வீரர்களுக்கு எப்பவுமே கிராக்கி அதிகம்தான்.
மியாண்டட், இம்ரான் கான், கபில் தேவ், கவாஸ்கர், ரணதுங்க, அரவிந்த, கங்குலி, ரவி சாஸ்த்ரி, கும்ப்ளே, வாசிம் அக்ரம் என பல வீரர்கள் ஆசிய சரித்திர நாயகர்களாக இருந்து ஓய்வு பெற்றவர்கள். இவர்களின் ஓய்வால் நிச்சயம் இவர்களது ரசிகர்கள் பாதிக்கப்பட்டிருப்பார்கள் என்பது திண்ணம்.

எங்கள் ஹீரோக்களை பார்த்து (ஆசியர்) மற்றைய கண்ட வீரர்கள் பொறாமைப்பட்டதும் உண்டு.

தற்போது விளையாடும் வீரர்களில் நீண்ட காலமாக விளையாடி வரும் வீரர்கள் என்றால் அது இலங்கையின் ஜெயசூரிய மற்றும் இந்தியாவின் டெண்டுல்கர் என கூறலாம். (இவர்களுக்குப்பின்தான் முரளி, டிராவிட் ஆகியோர் வந்தனர் எனலாம்)

கிரிக்கெட்டில் இவர்கள் இருவரும் சம அளவிலான சாதனைகளை வைத்துள்ளனர் எனலாம். மற்றும் விளையாட்டுக்கு அப்பால் இவர்கள் இருவரும் உயிர் நண்பர்களாக இருந்து வருகின்றனர் எனலாம். (ஐ பி எல் மும்பை இந்திய அணியில் ஜயசூரியவை சச்சின்தான் இணைத்தார் என்று பல தகவல்கள் வெளியாகின. சந்தோசம்தான். இரண்டு சிங்கங்கள் ஒரே அணியில் விளையாடுவது பெருமையே..)

ஒரு காலத்தில் பலவீனமான அணிகளில் ஒன்றாக இலங்கை அணி கருதப்பட்டது. ஆனால் 1996 உலக கிண்ணத்தை கைப்பற்றி பலரின் வாயை அடைக்கச் செய்தது. அதை வென்றமைக்கு மிக முக்கியமானவர்களுள் ஜெயசூரியவும் ஒருவர். மற்றும் அத்தொடரின் சிறந்த நாயகன் விருதையும் வென்றார்.அதிரடி ஆட்டம் என்றால் உடனே நினைவுக்கு வருபவர் ஜெயசூரியவே.

மற்றும் பல போட்டிகளில் சிறப்பான முறையில் பந்துவீசும் செய்து இருக்கிறார்.
இவருடைய சிக்ஸர்கள் பலரால் பேசப்பட்டவை. அந்நாட்களில் (1996-2000 போன்ற காலப்பகுதிகளில்) டெண்டுல்கர் 4 ஓட்டங்களுக்கும் ஜெயசூரிய 6 ஓட்டங்களுக்கும் பிரபலமாகவிருந்தனர். ஏன் இப்போதும் கூட இவர்கள்தான் ஞாபகத்தில் இருப்பர்.

இந்தியாவின் நம்பிக்கை நட்சத்திரமாக மிளிர்பவர் டெண்டுல்கர். இவர் அளவிற்கு இந்தியாவில் வேறெந்த கிரிக்கெட் வீரருக்கும் ரசிகர் இருக்கவில்லை. (தற்போது தோனி அதை மிஞ்சுவார் என்று தெரிகிறது.)

1997 - 1998 காலப்பகுதிகளில் ஆஸ்திரேலியாவுடன் வெற்றி பெறுவது கஷ்டமான விடயம் என்ற ரசிகர்களின் எண்ணங்களை மாற்றி அமைத்தவர் என சச்சினை கூறலாம். குறிப்பாக 1998 ஷார்ஜா கிண்ணத்தை தனது செஞ்சுரிகள் மூலம் பெற்றுக்கொடுத்தார். மற்றும் இவருடைய கவர்ச்சியான "ஷாட்"கள் பல ரசிகர்களை கவர்ந்தன. அணி நிலைமைக்கேற்ப இவருடைய ஆட்டம் இருக்கும்.

தற்போது "மும்பை இந்தியன்ஸ்" அணியில் இவர்கள் இருவரும் ஒன்றாக விளையாடி வருகின்றனர். மற்றும் ஐ பி எல் தொடரின் "சிறந்த ஆரம்ப ஜோடி" என்றால் நிச்சயம் இவர்கள் இருவரும்தான் (சேவாக் மற்றும் காம்பிர் இருவரும் புது ஜோடிதானே..ஆக இப்போதைக்கு இது வேண்டாம்)

இவர்கள் இன்னும் சில வருடங்களில் ஓய்வு பெற்று விடுவார்கள். இவர்களுடைய ஓய்வு நிச்சயம் கிரிக்கெட் உலகில் பாதிப்பை ஏற்படுத்தும். பாதிப்பு கிரிக்கெட் உலகில் மட்டும் அல்ல ரசிகர்களின் மனதிலும்தான்.

நன்றி...

அஜித் - ஒரு புரிந்துகொள்ள முடியாத நல்ல கதாபாத்திரம்..

உலகில் வெளிப்படையான கருத்துகள், உணர்ச்சிவசப்படுதல் போன்ற குணங்கள் நிறைந்த பிரபலங்களுக்கு எதிராகவும் ஆதரவாகவும் குரலிடுவோர் பலர் உள்ளனர். இந்தியாவில் எடுத்துகொண்டால் முன்னால் கிரிக்கெட் வீரர் சௌரவ் கங்குலி மற்றும் தமிழ் நடிகர் அஜித்குமார்..பல எதிர்ப்புகள் மற்றும் பாராட்டுக்களுக்கிடையில் இவர்கள் சாதித்து இருப்பது ஆச்சர்யமான ஒன்றுதான்.

தமிழ் சினிமா வரலாற்றில் பல எதிரிகளையும் அதற்கு நிகராக பல ரசிகர்களையும் வைத்திருக்கும் ஒரு நடிகர் யார் என்றால் சிறு குழந்தை கூட சரியாக பதில் சொல்லும்..
அது வேறு யாரும் அல்ல...அஜித்..

இவருடைய குணங்களுக்கு விரோதமாக இருக்கும் மக்கள் பலர். அதே போல் இவருடைய குணங்களை பார்த்து இவருக்கு ரசிகர்களான மக்களும் மிகவும் பலர்.

முள் பாதையில் தன் வெற்றி கொடியினை "தன்னம்பிக்கை" என்ற ஒரு சொல்லினால் நாட்டிவருபவர். அதிகம் அலட்டிக்கொள்ளாத ஒரு நடிகர் என பல ஊடகங்கள் இவரை புகழ்ந்துள்ளன. வெளிப்படையாக பேசக்கூடியவர் என்றும் பல ஊடகங்கள் இவரை கூறிவந்துள்ளன.

சினிமாவில் அறிமுகமான வேளையில் ஒரு மிகப்பெரிய வாகன விபத்தில் சிக்கினார்.
"இவருடைய காலம் இனிமேல் சரிதான்" என்று கூறி சில நாட்களுக்குள் யாரும் எதிர்பாரா விதமாக சரிவிலிருந்து மீண்டு வந்தார். மீண்டவுடன் "காதல் கோட்டை" "ஆசை" ஆகிய சூப்பர் ஹிட் படங்களும், "உல்லாசம்" "பவித்ரா" என்ற சுமாரான படங்களும் தந்து இளம் நடிகர்களில் சிம்ம சொப்பனமாக திகழ்ந்தார்.

அதன் பிறகு "காதல் மன்னன்" என்ற வெற்றிப்படத்தை தந்தார். அருமையான திரைக்கதையினால் அப்படம் வெற்றி பெற்றது. அதன் பிறகு "வாலி" "அமர்க்களம்" "ஆனந்த பூங்காற்றே" "முகவரி" "கண்டுகொண்டேன்" ஆகிய படங்களில் நடித்ததன் மூலம் நான் ஒரு நட்சத்திர நடிகர் என்பதை நிரூபித்து காட்டினார்.

"இலகுவில் நட்பு வைத்துக்கொள்ள விரும்பாத ஒரு நடிகர்" என்ற ஒரு பெயர் இவருக்கு சில சினிமா புள்ளிகளால் வழங்கப்பட்டிருந்தது.

அதன் பிறகு இவர் நடித்த "தீனா" "சிட்டிசன்" ஆகிய படங்கள் 2001 ஆம் ஆண்டுக்கான சிறந்த நடிகருக்கான விருதை வாங்கித்தந்தது. தொடர்ச்சியாக சில சுமாரான படங்களாக "பூவெல்லாம் உன் வாசம்" "ரெட்" ஆகியன வெளிவந்தன. தொடர்ந்து வந்த "ராஜா" தோல்வியை தழுவியது.

அதன் பிறகு வந்த "வில்லன்" திரைப்படம் பெரும் வெற்றி பெற்றது.

அதன் பிறகுதான் பல சிக்கல்கள் இவருக்கு உருவாகின. நான்தான் அடுத்த சூப்பர் ஸ்டார், அதனை "ஆஞ்சநேயா" படம் நிரூபிக்கும் என்று கூறினார். இந்த கருத்து பலரிடையே சர்ச்சையை ஏற்படுத்தியது. மற்றும் ஆஞ்சநேயா படமும் தோல்வியடைந்தது. அதன் பிறகு வந்த "ஜனா" அவர் வரலாற்றில் மிகப்பெரிய தோல்வியை தந்தது. மற்றும் சக நடிகர்களுடன் அவரை ஒப்பிட்டு வேறுபடுத்தி பார்த்ததால், குறிப்பாக விஜய்யுடன் அவரை போட்டியாக வைத்து பார்த்ததால் அவருக்கு பல எதிர் ரசிகர்கள் உருவாகினர் (அன்றைய சிவாஜி- எம் ஜி ஆர், கமல் - ரஜினி கூட்டணிகளுக்குள் இவ்வாறான ஒரு பிரச்சினைகள் உருவானதில்லை)

மற்றும் எளிதில் அவர் உணர்ச்சி வசப்பட்டு பேசிய வார்த்தைகள் பல சர்ச்சைகளை தோற்றுவித்தன. விழாக்களுக்கு சமூகமளிக்காமை, எதையும் கண்டுகொள்ளாமை என்று பலரால் விமர்சிக்கப்பட்டார். மற்றும் சத்தமில்லாமல் உதவி செய்தல் தனது ரசிகர் மன்றத்தை "நற்பணி மன்றமாக" மாற்றியமை ஆகியவற்றால் பலரிடமிருந்து புகழ் வந்து சேர்ந்தன.

தொடர்ந்து வந்த "அட்டகாசம்" திரைப்படம் வெற்றிபெற்றது, ஆனாலும் அடுத்து வந்த "ஜி" தோல்வியடைந்தது. தொடர்ந்து நடித்த "பரமசிவன்" ஓரளவு பெயரை வாங்கித்தந்தது. மற்றும் "திருப்பதி" சுமாராகவே ஓடியது. பின்னர் வந்த "வரலாறு" அவரை மீண்டும் உயர்நிலைக்கு அடைய உதவியது, அதன் பிறகு வந்த "கிரீடம்" ஹிட் ஆனது. ஆனால் "பில்லா" என்ற ரீமேக் படம் அவரை மீண்டும் சிகரத்தை அடைய உதவியது. ரஜினி படங்களுக்கு போட்டியாக வசூலை அள்ளித்தந்தது.மற்றும் சக நடிகர்களுடன் நட்புடன் பழகியமை, விழாக்களுக்கு சமூகமளித்தமை ஆகியவை இவருக்கு நல்ல பெயரை அள்ளித்தந்தன. இறுதியாக வந்த ஏகன் பெரிதாக ஓடவில்லை. அதாவது "சுமார்" ரகமே. மற்றும் "ஈழ தமிழர்களுக்காக நான் ஏன் உண்ணாவிரதம் இருக்க வேண்டும்" என்று இவர் கூறியதாக சர்ச்சைகள் எழுந்தன. அதனை அவர் மறுத்தார்.

தற்போது அவருடைய பிறந்தநாள் விழாக்களை கொண்டாட வேண்டாம் என்றும் "இலங்கை தமிழர்கள்" கஷ்டப்படும் வேளையில் நான் பிறந்தநாள் கொண்டாடுவது உகந்ததல்ல என்று கூறி பிறந்தநாளை கொண்டாட வேண்டாம் என்று ரசிகர்களுக்கு அன்பான எச்சரிக்கை விடுத்துள்ளார்.

தற்போது உள்ள இளம் நடிகர்கள் பலர் இவரை ஒரு ரோல் மொடேலாக வைத்திருக்கின்றனர். குறிப்பாக ஆர்யா, சிம்பு, நகுல், ரவி போன்றோர் ஆவர். இவற்றில் சிம்புவும் ஆர்யாவும் குறிப்பிடத்தக்கவர்கள்.

இவருடைய முன்னேற்ற பாதைகள் விரும்பாமல் இவரை திட்டி தீர்ப்போர் பலர் உள்ளனர். அப்படியிருந்தும் தமிழ் சினிமாவில் தனக்கென ஒரு ரசிகர் கூட்டத்துடன் நிலையான இடத்தில் இருப்பது ஒரு ஆச்சரியமான விடயமே.

இப்படி ஒரு கடின வாழ்க்கையை தாண்டி முன்னேறிய இவரை திட்டுவதற்கு மற்றவர்களுக்கும் தகுதி இருக்க வேண்டும்.

எனது இறுதி கருத்து "சினிமா என்பது திட்டி தீர்ப்பதற்கு உருவானதல்ல.."

வாரணம் ஆயிரம்..மீண்டும் என் பார்வையில்..

என்னதான் "அயன்" திரைப்படம் வெளிவந்தாலும், பலரின் மனதில் குறிப்பாக இளைஞர்கள் மனதில் "வாரணம் ஆயிரம்" படம் இன்னும் ஓடிக்கொண்டு இருக்கிறது..
குறிப்பாக படப்பாடல்கள் இன்னும் பலரின் வாயில் முணுமுணுக்கப்படுகிறது. நான் மீண்டும் அந்த திரைப்படத்தைப்பார்த்தேன். உண்மையில் கௌதம் மேனன் ரசித்து ரசித்து கதையை செதுக்கியுள்ளார் என்று கூறலாம்.

காதல் திருமணம் செய்த கிருஷ்ணன் மற்றும் மாலினிக்கு மகனாக சூர்யா. தன் அப்பாவை ரோல் மொடேலாக நினைத்து வளர்பவன். அப்பாவின் செல்லம். ஆரம்பம் முதல் தன் குடும்பம் மற்றும் தங்கையுடன் சந்தோசமாக வாழ்கிறான். இளமைக்காலத்தை அப்பாவின் சொல் தட்டாமல் அதே நேரம் மிகவும் ஜாலியாக கொண்டாடுகிறான். காலேஜ் இல் படிப்பதற்காக முதன் முதலாக தன் குடும்பத்திலிருந்து பிரிந்து காலேஜ் விடுதியில் தங்கி படிக்கிறான்.

காலேஜ் வாழ்க்கை முடிந்து வீடு வரும் வழியில் ஒரு பெண்ணின் மேல் காதல் கொள்கிறான். (கண்டதும் காதல்) அவளிடம் உடனே தன் காதலை கூறுகிறான். அவள் உடனே சம்மதிக்க மறுக்கிறாள். சில நாட்களின் பின் அவள் வீட்டுக்கே சென்று காதலை கூறுகிறான். அவள் அமெரிக்க சென்று படிக்கப்போவதாக கூறுகிறாள். தன் தந்தையின் அனுமதியுடன் அமெரிக்க செல்வதற்கும் திட்டமிடுகிறான். இடைப்பட்ட காலத்தில் "அப்பாவின் சுகயீனம், ப்ராஜெக்ட் வெற்றி" ஆகியவை அவன் வாழ்க்கையில் வந்து போகின்றன. அதன் பின் மீண்டும் "காதல்" பற்றி சிந்திக்கிறான். அமெரிக்காவிற்கும் பயணமாகிறான்.

அங்கு சென்று காதலியை சந்தித்து அவளிடமிருந்து சம்மதமும் வாங்கிக்கொள்கிறான். என்ன துரதிர்ஷ்டம் காதலிக்க ஆரம்பித்து இரண்டே நாட்களில் காதலி குண்டு வெடிப்பில் உயிரிழக்கிறாள். மனக்கவலையுடன் மீண்டும் வீட்டுக்கே (இந்தியா) வருகிறான், அவனால் காதலியை மறக்கமுடியவில்லை. இங்கு வந்து குடிப்பழக்கத்துக்கு அடிமையாகிறான். அவன் தந்தையின் அன்பான ஆணையால் காஷ்மீர் செல்கிறான். அங்கு தீவிரவாதிகளிடமிருந்து ஒரு பிள்ளையை காப்பாற்றுகிறான். மற்றும் குடிப்பழக்கமும் இல்லாமல் போகிறது. மீண்டும் அவன் வாழ்கையில் ஒரு வசந்தம் வந்தது போல் உணர்கிறான்.

தந்தையின் அனுமதியுடன் அவன் விருப்பப்பட்ட இந்திய இராணுவத்தில் சேர்கிறான், சேர்ந்து 6 வருடங்களில் உயரதிகாரி ஆகிறான். தன் தங்கையின் நண்பியின் காதலை ஏற்றுக்கொள்கிறான். இருவரின் வாழ்க்கையும் சந்தோசமாக போகிறது. இந்நேரத்தில் அவன் அப்பாவிற்கு மீண்டும் சுகயீனம் வருகிறது. அவன் இராணுவ கடமைக்கு சென்ற வேளையில் அவன் அப்பா உயிரிறக்கிறார். மீண்டும் அவனுக்குள் கவலைகள் வந்து உருவெடுக்கின்றன. "இன்னும் அப்பா எங்களுடன்தான் இருக்கிறார்" என்ற அம்மாவின் கருத்துடன். கதை சுபம்.

வித்தியாசமான கதை... "ஆட்டோகிராப்" "தவமாய் தவமிருந்து" "வெயில்" "கிரீடம்" போன்ற நல்ல கதையம்சம் உள்ள படங்களில் இதுவும் இணைந்துள்ளது.

இரட்டை வேடங்களில் சூர்யா அசத்தியுள்ளார். அதுவும் முதன் முதலாக பிரியும் வேளையில் தந்தை கல்லூரிக்கு மகனை வழியனுப்பும் போது மகன் சூர்யா கண்களில் இருந்து வரும் கண்ணீர், எங்கள் கண்களிலிருந்தும் கண்ணீரை வரவழைக்கிறது.
படத்தில் உள்ள அனைத்து முகமாற்றங்களும் (makeup) சூர்யாவிற்கு பொருந்தியிருக்கிறது.
காதலை இழந்து தவிர்க்கும் வேளையில் சூர்யாவின் நடிப்பு இன்னும் அருமை.

அம்மா வேடத்தில் வரும் சிம்ரன் அழகாக நடித்து இருக்கிறார்.

இன்னுமொரு பலம் தமிழிற்கு புதுவரவு "சமீரா ரெட்டி"..இந்த படத்தின் பின் பலருடைய மனதில் கனவுக்கன்னியாக இருக்கிறார். "நெஞ்சுக்குள் பெய்திடும்" பாடலுக்கு அவருடைய முகபாவனை அழகு.

திவ்யாவிற்கு ஆரம்பத்தில் பெரிதாக வாய்ப்பு இல்லை என்றாலும் இறுதியில் காதலை வெளிப்படுத்தும் நேரங்களில் அழகாக நடித்துள்ளார்.

என்ன இருந்தாலும் படத்தின் மிகப்பெரிய பலம் (பலமோ பலம்) படத்தின் பாடல்கள். (ஹரிஷ் அண்ணா..எப்படி உங்களால மட்டும்) ஹரிஷ் ஜெயராஜ் - கௌதம் கூட்டணி மீண்டும் ஜொலித்துள்ளது. "முன்தினம் பார்த்தேன்" "நெஞ்சுக்குள் பெய்திடும்" "அஞ்சல"
பாடல்கள் மீண்டும் மீண்டும் கேட்கத்தூண்டுகின்றன. "அடியே கொல்லுதே" பாடலுக்கு சூர்யாவின் நடனம் பிரமாதம். "ஏத்தி ஏத்தி" பாடல் அப்பாவியாய் இருந்து முன்னேறிய இளைஞர்களுக்கு ஒரு "தேசிய கீதம்".

ரத்னவேலுவின் ஒளிப்பதிவு பிரமாதம்.

ஒரு தந்தைக்கும் மகனுக்கும் உள்ள ஆழமான புரிந்துணர்வு மிக அழகாக சித்தரிக்கப்பட்டுள்ளது.